Allah Ta’ala Ki Bargaah Mein Uske Mehboob Bando’n Ko Waseelah Banana



Allah Ta’ala Ki Bargaah Mein Uske Mehboob Bando’n Ko Waseelah Banana

 

Is unwaan se muta’alliq Ahadees itni jyada hain ki in sabko shumaar karna or likhna mushkil hai chand Ahadees aap aane wale saf-haat mein mulahiza farmayenge.

Allah Jalla Shanuhu ka qurb uski raza haasil karne or apney gunaaho’n ki magfeerat karaney ke liye Allah walo’n uske naik bando’n ko waseela banana ummatey muslima’n mein humesha se rayej raha hai.

Khud khuda wand quddus iska huqm farmata hai.

Tarjumah:

Agar woh log apni jaano par julm karein (Gunnah karein) to Aye Mehboob woh tumharey huzoor haazir ho phir Allah Ta’ala se maafi chaahein or Rasool inki shafa’at chaahein to jarur Allah ko bahut tobah qabool karne wala meharbaan payenge.

(Para 5 Ruku’a 6)

Is aayat kareema mein Khudaye Ta’ala ne baraahey raast apni taraf ruju karne ka hukm na dekar Rasoolallah ﷺ ki bargaah mein haaziri dene ka hukm diya hai. Or Huzoor ﷺ ke liye hukm diya hai ki woh bhi in gunaahgaro’n ki shifarish farmaye. Or ek Aayat mein to saaf irshaad farmaya jata hai jiska tarjumah yeh hai:

“Or uski taraf waseela dhundho’n”

(Para 6 Ruku’a 9)

Is Aayat ki tafseer mein haashiyaye Saawi Alal Jalalein mein hai –

Yaani Aayat mein majkoor waseeley ke ma’eeney mein Ambiya wa Auliya ki mohobbat bhi dakhil hai, Aayatein kareema ki is tafseer se Un logo’n ki galat fehmi bhi door ho gayi jo kehte hain ki waseela sirf aamaley swaleh or namaaz roza wagerah aehkaam shar’aa hain inke zariye se qurbey Ilahee haasil hota hai, sahi baat yeh ki naik kaam namaaz roza wagerah bhi waseela hain or jinke zariye Allah Ta’ala ne hum tak namaaz – roza pahunchaya hai woh sabse badh kar waseela hain inse mohobbat wa aqeedat na rakhne wale or inko waseela na bananey walo’n ke namaaz or rozey bhi nakaabil qabool hain, Qur’an Azeem mein dusri jagah irshaadey Khuda Wandi hai-

Or humne tumhe na bheja magar rehmat saare jahaan ke liye”

(Para 17 Ruku’a 7)

Is Aayat ka saaf or wajeh matlab yehi hai ki Allah Ta’ala jis ko bhi kayenaat mein jo kuch ata farmata hai woh sab Huzoor ﷺ ka sadqa or waseela hai kyunki aap har shay ke liye Allah ki rehmat hain.

Ek or farmaney Khuda Wandi hai-

“Woh maqbool bandey jinhe kaafir pujtey hain woh aap hi apne Rab ki taraf waseela dhundhtey hain ki inme kaun jyada mukarrab hain.Iski rehmat se ummeed rakhtey hain or uske azaab se darte hain.”

(Para 15 Ruku’a )

Haan yeh aqeeda rakhna bhi nihaayat jaruri hai ki Allah Ta’ala m’aazallah waseela ka mohtaaj nahin hai balki woh kisi baat mein hargiz kisi ka mohtaaj nahin hai na usey kisi ki jarurat balki har ek ko uski jarurat hai. Baat sirf yeh hai ki Allah Ta’ala har baat par Qadir hai bagair waseela ke bhi de sakta hai lekin waseela usko pasand hai or apne mehboobo’n ke jariye ata farmana uski marzi hai.

Khulaasaye kalaam yeh ki jis tarah Parwar-digarey aalam baadlo’n ke waseeley se baarish, suraj ke waseeley se dhoop, or chaand ke waseeley se chandni ata farmata hai, bachho’n ko Maa-baap ke zariye paida farmata hai or unhi ke zariye unhe paalta hai or rozi-roti ata farmata hai or isse uski zaat mein koi nuks nahin aata na iski shaan mein koi fark aata hai bas yoon hi samajhiye ki uski marzi hai ki kayenaat aalam ke khajaaney zaahir or batinee nemtein jisko bhi mile woh bargaahey Habibey Khuda Mohammed Mustafa ﷺ se miley or unhe ke ghulamo’n nek bando’n ke waseeley se bantey isse uski shaan mein koi fark or koi aib nahin aata or iski shaan or Parwardigari mein hargiz hargiz koi kami nahin aati or aesa aqeeda Tauheed ke mukhalif nahin.

Yeh khayaal ajeeb hai ki namaaz roza to Allah Ta’ala tak pahunchney ka waseela ho or jo namaaz rozey or aehkaamey ilahiya ka bhi waseela hai woh waseela na ho. Jabke namaaz roza wagerah nek kaam jo hum karte hain humein pata nahin yeh qabool bhi hotey hain ya nahin lekin jo Allah ke Rasool hain jinko Allah Ta’ala hi ne namaaz roza aehkaam shar’aa sikhaney ke liye bheja hai woh yaqeenan Allah ke yahaan maqbool hai balki uske Mehboob hain inke waseeley ko shirk kehna hargiz Islami aqeeda nahin hai. Or yeh Musalmano’n ki boli nahin hai.

Ab waseela Ambiya-Auliya se muta’alliq Ahadees mulahiza farmaye :

Hadees No. 1:

Hazrat Abu Saeed se marwi hai ki Huzoor Nabi Kareem ﷺ ne irshaad farmaya ki ek aesa zamana aayega jab log fauz-dar-fauz hokar jihaad karenge to inse puchha jayega ki tumharey darmiyaan koi aesa shakhs hai jisne Rasoolallah ﷺ ki sohbat ka sharf haasil kiya ho jawaab mein kaha jayega Haan to uski barkat or waseela se jung mein fatah hogi phir ek zamana aayega or log jihaad karenge to inse maloom kiya jayega kya tum mein koi aesa hai jisne Huzoor ﷺ ke Sahaba ko dekha ho jawaab hoga Haan to iske waseeley se jung mein kamyabi milegi, phir ek zamana aayega or log jihaad karenge to inse puchha jayega ki tum mein se koi aesa hai jisne Huzoor ﷺ ke Sahaba ke sohbat haasil karne walo’n ki sohbat ka sharf haasil kiya ho jawaab hoga Haan to iske zariye kamyabi haasil hogi.

(Bukhari Zild No. 1 Kitaabul Jihaad Safa 406)

Yeh Hadees saaf taur par bata rahi hai ki Huzoor Nabi Kareem ﷺ ka mukaam to Allah hi janey aapke ghulamo’n or ghulamo’n ke ghulamo’n ki shaan yeh hai ki inke waseeley se jungo’n mein Islami fauzo’n ko fatah haasil hota hai.

Hadees No. 2:

Hazrat Sayyadana Ali Radiallaho Ta’ala Anho se marwi hai ki Rasoolallah ﷺ se maine suna hai ki Abdaal mulq-e-shaam mein hongey or woh 40 hongey, jab inme se ek duniya se rukhsat hotey hain to inki jagah Khudaye Ta’ala dusre ko bhej deta hai inki barkat se baarishey barasti hain inke waseeley se dushmano’n par fatah hoti hai or inke waseeley se Shaam walo’n se azaab door hota hai.

(Mishkaat Baab Zikril Yaman wa Shaam Safa 582)

Hadees No. 3:

Hazrat UsmanBin Hunaif se marwi hai ki ek sahab jo naabeena they Huzoor Nabi Kareem ﷺ ki khidmat mein haazir hue or arz kiya Ya Rasoolallah ﷺ mere liye Allah Ta’ala se dua kijiye ki meri aankhein theek ho jayein yaani meri binayee wapas aa jaye Huzoor ﷺ ne irshaad farmaya ki tum chaho to main dua karoon or agar chaho to sabr karo or yeh sabr karna jyada achha hai woh sahab farmaney lagey Huzoor dua farma dein. To Rasoolallah ﷺ ne inko hukm diya woh achhi tarah wuju karein or phir yeh dua padhein –

“Aye Allah main tujhse mangta hoon or teri taraf tere Nabi Muhammed ﷺ ko waseela bana kar mutawajja hota hoon jo rehmat waley Nabi hain. Or Ya Rasoolallah ﷺ main aapke waseeley apne Rab se dua karta hoon taki meri yeh haazat poori ho or Aye Allah tu Huzoor ki shafa’at mere haq mein qabool farma.

(Tirmizee Zild 2 Abba-bud-awaat Safa 196, Mishkaat Baab Jaami-ud-dua Safa 219)

Is Hadees mein naabeena Sahabi ka Huzoor ﷺ ki khidmat mein apni haazat baraayi ke liye jana waseela hai. Or Huzoor ﷺ ne inko jo dua taleem farmayi isme bhi apne waseeley se dua maangney ka hukm diya, is Hadees mein Rasoolallah ﷺ ko waseela bananey aapki taraf mutawajja honey balki aapko haazir ke seegey se pukarney ka bhi zikr hai. Yaani Ya Rasoolallah kehna jayez hai.

Hadees No. 4:

Hazrat Anas Bin Maalik se marwi hai ki jab Madeena Munawwara mein sukha padta to Hazrat Umar Farook Radiallaho Ta’ala Anho Hazrat Abbas Ibne Abdul Muttalib ke waseeley se barish ki dua maangtey or kehtey they Ya Allah hum tere Nabi ke waseeley se barish maangtey they to hum par barish hoti thi ab hum tere Rasool ke chacha ke waseeley se barish maangtey hain to tu humko sairaab kar de, Hazrat Anas kehte hain Hazrat Umar ki is dua se khoob barish hoti.

(Bukhari Zild No. 1 Abwabul Istiska Safa No. 137, Mishkaat Safa 132)

Hadees No. 5:

Hazrat Abdullah Ibne Deenar riwayat karte hain ki humne Hazrat Abdullah Ibne Umar ko Abu Talib ka yeh sher padhtey suna (Or phir Arbi ka ek sher padha jiska tarjumah yeh hai) woh gauri rangat waley jinke chehre ke waseeley se barish mangi jaati hai. Woh yateemo’n ki fariyaad sunne waley or mohtaaz or kamzaur logo’n ka sahara hain.

Hazrat Saalim kehte hain ki maine Hazrat Abdullah Ibne Umar ko farmatey hue suna ki kabhi aesa hota ki main shaayer ke is sher ko zehan mein lata or Rasoolallah ﷺ ke us chehre ko dekhta jiske waseeley se barish maangi jati hai to aap mimbar se utar bhi na patey ki itni barish hoti ki parnaaley beh jaatey or woh sher Abu Talib ka hai.

(Bukhari Zild No. 1 Safa 137)

Rasoolallah ﷺ or digar Ambiya kiraam or buzurganey deen ki shaan ko ghataaney waley logo’n ke samne Sahi Bukhari ki yeh Hadees padhi jaati hai jisme saaf hai ki Hazrat Umar ne Hazrat Abbas ke waseeley se barish ki dua maangi. To yeh log isme yeh taweel karte hain ki Rasoolallah ﷺ ke bajaaye Hazrat Abbas Huzoor ke chacha ke waseeley se Hazrat Umar ke dua maangney ka matlab yeh hai ki waseela zindo ka hai murdo ka nahin Huzoor they to inke waseeley se maangtey they Huzoor nahin hain to aapke chacha ke waseeley se. Halanki Hadees ka saaf matlab yeh hai ki Hazrat Umar Farook Radiallaho Ta’ala Anho batana chahtey hain ki Huzoor ﷺ aapke rishteydaaro ke waseeley se bhi dua maangi ja sakti hai. Or Hazrat Abbas ka waseela bhi Huzoor ka waseela hai kyunki inko waseela isliye banaya gaya ki woh Huzoor ke kareebi or chacha hain to yeh Huzoor ka hi waseela hai. Iske alawa is Hadees ki sharah karte hue Allama Ibne Hajar Asklaani ne Ibne Abi Shaiba ke hawaaley se isnaad ko sahi batatey hue ek Hadees naql ki hai jisme hai ki Hazrat Umar Farook Radiallaho Ta’ala Anho ki khilaafat ke zamaney mein jab yeh sukha pada to ek sahab Huzoor ﷺ ki Qabr-e-Anwar par haazir hue or arz kiya Ya Rasoolallah apni ummat ke liye barish maangiye log halaak ho rahe hain to Huzoor ek Sahabi ko khwaab mein nazar aaye or farmaya ki Umar ke paas jao or inse istiska ke liye kaho to ab saaf zaahir ho gaya ki wisaal ke baad Allah Ta’ala ke mehboob bando’n ki qabr ki haaziri or inka waseela jayez hai.

(Fatah Albaari Sharah Bukhari Zild 2 Safa 639 Matba’a Darus-slaam (Riyaaz))

Ambiya Auliya ke waseeley ke munkareen ke samne jab Qur’an ki aayat “Allah tak pahunchney ke liye waseela dhundho” jisme saaf waseeley ka huqm hai padhi jaati hai to Allah walo’n ke mukhalif kehte hain ki Aayat-e-kareema mein waseeley ka matlab nek kaam namaaz roza wagerah hain nek bandey nahin or jab aesi Ahadees padh ke sunao jisme bandgaaney Khuda ko waseela banaya gaya ho to taweel karte hain ki zindo’n ka waseela hai murdo’n ka nahin. Idhar-udhar bhaagtey bidaktey hain or Khuda ke nek bando’n ki shaan ghataaney ki poori koshish karte hain or apni saari kabiliyat isi mein kharch karte hain is kitaab ke aane waley saf-haat mein aap is silsiley ki Ahadees mulahiza farmayenge ki Khuda waley duniya se rukhsat honey ke baad bhi zinda hain inki zindagi or maut mein is kism ka fark paida karna Qur’an wa Hadees ke khilaaf hai balki aam log bhi markar ke bilkul fana nahin ho jaatey maut to jism se rooh ke nikalney ka naam hai khatam honey ka naam nahin, Allah walo’n ki shaan to bahut buland hai khaskar Rasoolallah ﷺ baad wisaal bhi mukammal taur par zinda wa jaaved hain.

Buzurgaaney Deen ko waseela banana shirk kaise ho sakta hai, shirk to yeh hai ki jo baatein Khudaye Ta’ala ke liye khaas hain woh kisi or mein mani jaaye to itni baat to nihaayat anpadh har Musalman janta hai Khudaye Ta’ala asar karne nafa nuksaan pahunchaney ka waseela wa zariya nahin balki woh to khud dene bakhshaney wala nafa nuksaan pahunchaney wala hai na ke waseela wa zariya. Yeh to sirf makhlook hi ho sakti hai.

Or shirk ke maamley mein to zindey or murdey ka fark karna bhi bekaar baat hai jo baat Khudaye Ta’ala ke sath khaas hai isko kisi dusre ke liye manna behar-haal shirk hai. Khwaah woh dusra zinda ho ya murda jaise Allah Ta’ala ke alawa kisi or ki ibaadat or pooja karna shirk hai to agar zindey ki pooja wa ibaadat karega tab bhi mushrik or murdey ki karega tab bhi. Ya jaise Allah Ta’ala ke alawa kisi aur ko Allah ki tarah Qadir wa Khalik wa qadeem manna shirk hai to agar koi murdey ko maanega tab bhi or zindey ko maanega tab bhi shirk hi hoga. Jo log zindo’n ke waseeley ke qaayal hain lekin baad wisaal ke waseeley ko shirk kehte hain to goya ke unhoney zindo’n ko Allah Ta’ala ka shareek or sajhi maan liya hai lekin murdo’n ko nahin to yeh khud hi mushrik hain, Khudaye Ta’ala unhe samajh ata farmaye agarchey in logo’n ki islaah ke liye humara itna bayaam kafi hai lekin majeed inki tasalli ke liye Hadees bhi naql kar dein jisse saaf zaahir ho jaaye ki baad wisaal yaani duniya se rukhsat ho jaaney ke baad bhi Allah Ta’ala ke makhsoos bando’n ko Allah Ta’ala ki bargaah mein waseela banana jayez hai.

Hadees No. 6:

Hazrat Abu Jauza Radiallaho Ta’ala Anho ne farmaya ki ek martaba Madeeney mein sakht sukha pad gaya logo’n ne Hazrat Aayesha Radiallaho Ta’ala Anha se shikayat ki aapne farmaya ki Rasoolallah ﷺ ki Qabr-e-Anwar ko dekho or iske theek oopar Aasmaan ki jaanib chhat mein surakh kar do yahaan tak ke Qabr-e-Anwar or aasmaan ke beech koi parda na rahey logo’n be aesa hi kiya to is zor ki barish hui ki khoob sabja uga haryaali chha gayi or oont motey ho gaye yahaan tak ke inki charbi fati jaati thi or is saal ko khush-haali ka saal kaha jaaney laga.

(Mishkaat Baabul Karamaat Safa 545)

Is Hadees se zaahir hai ki baad wisaal Huzoor ﷺko or Huzoor ki Qabr-e-Anwar ko in logo’n ne barish maangney ke liye waseela banaya jo sab Sahaba or Tabe’een they or khud Ummul Momineen Hazrat Aayesha Saddiqa ne yeh tarkeeb batayi, to zaahir ho gaya ki Sahaba Kiraam baad wisaal bhi waseeley ke qaayil they.

Hadees No. 7:

Hazrat Umayya Ibne Khalid se marwi hai ki Rasoolallah ﷺ muhajireen durwesho’n ke waseeley se jungo’n mein fatah ki dua maangtey they.

(Mishkaat Baab Fazlil Fukra Safa 447)

Hadees No. 8:

Abdullah Ibne Dinaar se marwi hai ki Hazrat Abdullah Ibne Umar Radiallaho Ta’ala Anhuma jab safar ko nikaltey ya jab safar se wapas aatey to pehle Rasoolallah ﷺ ki Qabr-e-Anwar par haaziri dete. Huzoor par durood padhtey or wahaan dua maangtey phir laut jaatey.

(Mu’atta Imam Maalik Baab Qabrin-Nabiye ﷺ Safa 396)

Hazrat Abdullah Ibne Umar ka safar se aatey or jaatey waqt Qabr-e-Anwar par khadey hokar Durood Shareef padhna or dua maangna yaqeenan baad wisaal aapki Qabr-e-Anwar ko or baad wisaal aapko waseela banana hai warna dua har jagah maangi ja sakti hai Qabr-e-Anwar par dua maangney ka aakhir or kya matlab hai?

Hadees No. 9:

Hazrat Saad Ibne Abi Wakkas Radiallaho Ta’ala Anho se riwayat hai ki Rasoolallah ﷺ ne farmaya ki tumhari madad ki jaati hai or tumhe rozi milti hai yeh sab tum mein ke kamzor logo’n ka waseela hai.

(Sahih Bukhari Kitaabul Jihaad Safa 405)

Yahaan yeh baat bhi kaabil-e-gaur hai ki humari is unwaan ke tehat zikr karda woh pehli Hadees or is Hadees ke liye mash’hoor wa maroof Muhaddis Imam Bukhari apni jaam’aye Sahih mein jo Baab laaye hain yaani Man Ist’aan Bil Zafa Wal Swaleheen Fil-harb iska tarjumah hi yeh hai ki kamzor “Jungo’n mein kamzoro or neko’n ke waseeley se madad chahna”

Goya Hazrat Imam Bukhari ke aqeedey mein bhi mehboobey Khuda ko bargaahey Khuda mein waseela banana yaqeenan pasandeeda hai.

Tags: , ,

Leave a Reply

Your email address will not be published. Required fields are marked *